Northern Thai Story - the Dumb friend and the Smart friend

นิยายเรื่องเสี่ยวง่าวเสี่ยวหล้วก

     มีวันนึ่งสองเสี่ยวพากันไพจกสาวในบ้าน ซ้ำบ้านสาวเพิ่นเอาไม้ลิดไม้มาแปลงขอนป้องร่องหล่อ เสี่ยวหล้วกก็หื้อเสี่ยวง่าวนั่งอยู่ไม้ขอนป้องหล่อถ้าจนขอนป้องหล่อเปลี่ยนเพทเปนลวงแล้วพาไพ เถิงเวลาลวงจะออกไพหากินหน่อเงินหน่อฅำที่ตาวันออกมาส่องโลกใหม่พู้น เสี่ยวง่าวก็ได้ขี่หลังไม้ลิดไม้เปนลวงนั้นไพ จะลงก็บ่ได้ ก็เลยได้ขี่หลังลวงนั้นไพจนรอดที่หน่อเงินหน่อฅำออกที่ตาวันออกใหม่ที่เขาสัตตภัณพู้น ไอ้ง่าวก็เลยขี่หลังลวงอยู่หักเอาหน่อเงินหน่อฅำที่ลวงกิน ส่วนลวงนั้นบ่ใช่มีตัวเดียว มีเถิงหมื่นตัวแสนตัว พอเถิงเวลาใกล้แจ้งลวงก็พาไอ้ง่าวพิก มาลงที่เก่าที่บ้านสาวหั้น พอเถิงรุ้งแจ้งแล้วเสี่ยวหล้วกก็ไพบ้านก็ไพด่าเสี่ยวง่าวว่า
     "หน้าหมา ราหื้อเปนเพื่อนหนีละรา"
     "โธ่ราบ่ได้ลักหนีจ้าเสี่ยว ข้านั่งอยู่ขอนป้องหล่อสาวถ้า คั้นพอเหง้าหลอกไม้ขอนป้องหล่อพาข้าไพกินหน่อเงินหน่อฅำที่ตาวันออกใหม่พู้น ข้าก็นั่งขี่หลังไม้ขอนป้องหล่อหักเอาหน่อเงินหน่อฅำใส่ถงเสื้อมาเตมสองถงเสื้อ บ่เชื่อก็ผ่อเทอะกองอยู่ที่นอนหั้น"
     เสี่ยวหล้วกก็ไพผ่อคีมแท้ดั่งมันว่า เสี่ยวหล้วกก็เลยบอกกับเสี่ยวง่าวว่า
     "วันพรูกเราไพจกสาวแถมน่อ ราจักหื้อฅิงจกสาวเล่าราจักถินั่งเหง้าหลอกหลังขอนป้องหล่อ ราจักเอาถงไพทวย เยียะเชื้อฅิงมันได้หน้อย ราจักเอาถงไพหาบนึ่ง"
     ฅ่ำมาก็พากันไพ เสี่ยวหล้วกก็ส่งเสี่ยวง่าวจกสาวหั้นแล้วถิไพนั่งเหง้าหลอกอยู่ขอนป้องหล่อเหมือนเสี่ยวง่าว เถิงเวลาขอนป้องหล่อเปนลวงออกหากินเสี่ยวหล้วกก็ขี่หลังลวงไพเถิงที่หน่อเงินหน่อฅำออก ลวงก็กินหน่อเงินหน่อฅำ ไอ้เสี่ยวหล้วกก็หันเอาหน่อเงินหน่อฅำใส่ถงเมื่อใดก็บ่เตมสักเทื่อ ก็เลยโตนลงจากหลังลวงเสียหักเอาเตมสองถงแล้วผ่อหาลวงตัวที่ขี่ไพก็บ่รู้จักแล้ว ลวงเปนหมื่นเปนแสนตัว เจ้าก็เลยหลงอยู่หั้น แจ้งมาตาวันออกมาใหม่ตายเสีย บ่ได้มาบ้านซ้ำ